Vinnuligar fiskiveiðiroyndir eftir makreli og norðhavssild í 2014

Fiskimálaráðið hevur útlutað 3.500 tons av makreli og 500 tons av norðhavssild til 5 verkætlanir í sambandi við vinnuligar fiskiveiðiroyndir í 2014.

 
Hesar 5 umsóknirnar søktu um tilsamans 14.500 tons av makreli og minst 1700 tons av norðhavssild. Kvoturnar eru útlutaðar sambært § 27 í kunngerð nr. 84 frá 4. juli 2014 um skipan av fiskiskapinum eftir makreli og norðhavssild við fiskiførum undir føroyskum flaggi í 2014, sum broytt við kunngerð nr. 86 frá 25. juli 2014.

Tá umsóknarfreistin var farin, hevði Fiskimálaráðið fingið 5 umsóknir um lut í kvotunum, sum eru settar av til vinnuligar fiskiveiðiroyndir eftir makreli og norðhavssild. Harafturat kom ein umsókn ov seint inn og varð aftursend, og tískil ikki viðgjørd.

Játtaðar umsóknir

Ein verkætlan, sum skal menna kompressaraskipan (luftpumping) til smærri skip (2+1), reiðskap og skiljing av livandi sild og makreli í sjónum og umborð, hevur fingið tillutað 800 tons av makreli og 100 tons av norðhavssild.

Ein verkætlan, sum framhaldandi mennir pumpuskipan til størri skip (2+1) hevur fingið tillutað 200 tons av makreli og 100 tons av norðhavssild.

Ein verkætlan við skipi/skipum knýtt at minni uppsjóvarvirki hevur (aftur í ár) fingið tillutað 1500 tons av makreli og 200 tons av norðhavssild fyri at samskipa fiskiskap, landing, flutning og víðarigóðsking á landi og marknaðarføring

Ein tilsvarandi verkætlan við tveimum partrolarum (2+2) knýtt eisini at einum minni uppsjóvarvirki hevur fingið tillutað 700 tons av makreli fyri at samskipa fiskiskap, landing, flutning og víðarigóðsking á landi og marknaðarføring.

Ein líknandi verkætlan við 4 nótabátum knýtt at bæði einum landingarstaði og einum framleiðsluvirki (í aðrari oyggj) hevur fingið 400 tons av makreli og 100 tons av norðhavssild fyri at samskipa fiskiskap, landing, flutning og víðarigóðsking á landi og marknaðarføring.