Fiskiveiðisamráðingarnar millum Føroyar og Noreg slitnaðar

Umboð fyri fiskiveiðimyndugleikarnar hjá Føroyum og Noreg høvdu samráðingar í farnu viku um eina fiskiveiðiavtalu fyri 2009. 

Grundað á, at Noreg setti sum ófrávíkiligt krav, at Føroyar og Noreg seta og býta eina makrelkvotu í Norðurhøvum landanna millum, var ikki komið til semju um eina sínámillum fiski­veiði­avtalu.

Føroyar vístu á, at málið um at áseta eina slíka kvotu og býtið ikki var á dagsskrá til henda fundin, tí málið er ikki partur av sínámillum fiskiveiðiavtaluni. 

Norska samráðingarnevndin boðaði frá, at skipanin, ið loyvir føroysku skipunum at fiska í norskum sjógvi eftir ársskiftið, hóast ongin avtala er gjørd, fer úr gildi. Grundað á hesa norsku avgerðina boðaði føroyska samráðingarleiðslan frá, at norsk skip eisini skulu úr aftur føroyskum sjógvi. 

Væntandi verður fundur aftur millum Føroyar og Noreg í komandi viku.

Fiskimálaráðið, 12. januar 2009