Fiskiveiðiavtala millum Føroyar og Grønland fyri 2019

Føroyar og Grønland hava í dag skrivað undir avtalu í Keypmannahavn um sínámillum fiskiveiðirættindi fyri 2019.

Seinastu árini eru fiskiveiðiavtalurnar millum Føroyar og Grønland útbygdar munandi, og londini eru samd um at halda fram við góða samstarvinum.

Vísindaliga tilmælið er, at toskakvotan í Eysturgrønlandi eigur at lækka í mun til 2018, og eisini er semja millum strandarlondini um at lækka svartkjaftakvotuna fyri komandi ár. Hetta merkti samráðingarnar á tann hátt, at kvoturnar av hesum fiskasløgum vórðu stillaðar nakað niðureftir.

Føroyskum skipum verður loyvt at fiska tilsamans 1.325 tons av toski og 475 tons av brosmu í grønlendskum sjógvi. Talan er um eina lækking á 100 tons av toski í mun til 2018. Kvotan av svartkalva verður óbroytt 325 tons. Føroyar varðveita eina royndarkvotu eftir krabba við Eysturgrønland á 500 tons.

Føroyska svartkalvakvotan við Vesturgrønland verður verandi 100 tons eins og í 2018.

Grønlendska kvotan av svartkjafti í føroyskum sjógvi lækkar við 2.500 tonsum niður í 13.500 tons. Grønland fær harumframt, eins og í 2018, atgongd at fiska ta kvotu av svartkjafti, sum Grønland fær tillutað ígjøgnum NEAFC, í føroyskum sjógvi. Hetta eru góð 6.200 tons í 2019, sum eru 1.320 tons minni enn í 2018. Grønlendskum skipum verður harumframt loyvt at fiska 3.200 tons av norðhavssild; her er talan um eina hækking á 700 tons í mun til 2018.

Tað vóru grønlendski samráðingarleiðarin, Emanuel Rosing, og føroyski samráðingarleiðarin, Andras Kristiansen, sum skrivaðu undir sínámillum avtalu um fiskiveiðirættindi fyri 2019.

Samráðingarnar fóru fram á Norðuratlantsbryggjuni í Keypmannahavn.