Fiskiveiðiavtala millum Føroyar og Grønland fyri 2012

Eftir samráðingar í Keypmannahavn, 15. og 16. november, hava Føroyar og Grønland skrivað undir fiskiveiðiavtalu fyri 2012.

 

Avtalan fevnir um somu fiskasløg sum undanfarin ár, og er á nakað sama støði sum undanfarin ár. Grønlendska sildakvotan í føroyskum sjógvi verður lækkað við 650 tonsum, so hon verður 2.350 tons, meðan føroysku botnfiska­kvoturnar í grønlendskum sjógvi verða óbroyttar.

 

Føroysku svartkalvakvoturnar í Eysturgrønlandi og í Vesturgrønlandi í 2012 verða ávikavist 275 tons og 100 tons, og nøgdin av toski í Eysturgrønlandi verður 255 tons. Harumframt kunnu føroysk rækjuskip gera fiskiroyndir á norðaru leiðunum í Eysturgrønlandi avmarkað til 100 tons.

 

Grønland fær 2.350 tons av norðhavssild av føroysku strandarlandakvotuni, og eitt grønlendskt línuskip kann royna eftir botnfiski í føroyskum sjógvi í upp til 60 dagar. Grønland kann veiða 2.000 tons av svartkjafti, sum Grønland hevur fingið tillutað gjøgnum NEAFC, í føroyskum sjógvi. Hetta er ein hækking í mun til í 2011, tá svartkjaftakvoturnar vóru søguliga lágar.

 

Jákup Mikkelsen, landsstýrismaður í fiskivinnumálum, er væl nøgdur við avtaluna við Grønland, sum er tann fyrsta avtalan, síðani hann gjørdist landsstýrismaður. “Tað er eydnast okkum at gera eina avtalu, har okkara fiskimøguleikar í grønlendskum sjógvi eru óbroyttir, men har kvoturnar hjá hinum partinum eru javnaðar samsvarandi teimum broytingum, ið hava verið í møguleikunum hjá okkum at lata burturav.”

 

“Avtalurnar millum Føroyar og Grønland hava stóran týdning fyri partar av fiskivinnuni í hvørjum landi sær og birta undir, at londini kunna varðveita fjølbroytni í teirra fiskiflota. Hetta er við til at leggja lunnar undir framhaldandi samstarv millum londini”, sigur Jákup Mikkelsen, landsstýrismaður.